سحر الكلام

وِهَكْتِبْلِكْ حَبِيبتِى بِجَدْ

كَلام سِحرُه يَفُوُقُ الحَدْ

يِدَوِّبْ كُلْ أحْزَانِكْ

يِصَحِّي الشُوُقُ فِى وِجْدَانِكْ

ويِحْيِى الحُبُ فِى زَمَانِكْ

يِخَلِيِكِ أمِيرَهْ بِجَدْ

وَهَرْسِمْلِكْ كَمَانْ صُورَهْ

مَلامْحِكْ فِيهَا أمُّورَهْ

شَفَايفِكْ وَردْ مِتْفَتَّحْ

عُيُوُنِكْ دُنْيَا مَسْحُوُرَهْ

رُمُوُشِكْ فِيَهَا بِتضَلِّلْ

عَلَى عُيُوُنِكْ وبِتْكَمِّلْ

مَعَانِي غَايبَه فِى زَمَانْنَا

مِخَلِيَاكِى أسْطُوُرَهْ

وَهَأبْنِى قَصْر فِى خَيَالِكْ

وأكُوُنْ فَارِسْ فِى أحْلامِكْ

وأكُوُنْ زَهْرَهْ فِى بُسْتَانِكْ

عَبِيرهَا يِرُوُحْ مَعَ وجُوُدِكْ

وأكُوُنْ قَدَرِكْ ومَكْتُوبِكْ

وأكُوُنْ حُبِّكْ ومَحْبُوبِكْ

وأكُوُنْ عَاشِقْ لأحْلَى عُيُونْ

وتِبْقِي سَاكنَهْ قَلْب حَنُونْ

يَخْلِصْلِكْ ومَهْمَا يكُونْ

مَا يَقْسَى لَحْظَهْ ويفُوتِكْ

الكاتب

أحمد حمدى شمعة

20.3.2021