مافيش فايدة
قالتلي خلاص كده كفاية
صبرت كتير مافيش فايدة
تعبنا بداية ونهاية
لكن دنيتنا مش رايدة
قالتلي خلاص
مافيش فايدة
صحيح إنك ...
رجولتك سابقة اقوالك
أصيل جواك
صحيح إني ...
باحس بقلبي متطمن
وأنا وياك
وحنية سنين قلبك
تكفى الدنيا وما فيها
بترسم بسمة مع إنك
هموم الدنيا مداريها
تسيب قلبك بيتعذب
ومش راضي أحسها فيك
وبيحارب عشان يكدب
لكن باين ف لمع عنيك
لكني تعبت
يأست لحد ما اليأس
بدأ ييأس
وقاللي خلاص
مافيش ف الدنيا دي غيري
ياريت نخلص
ظروفك لسة مش سامحة
كفاية معافرة ومقاوحة
في شيء بينا ياريت تنساه
وسيب الحب للي معاه
زمان الحب عدى وفات
طلع كله كلام روايات
في حضنك قلبي متدفي
وجودك جنبي بيكفي
كفاية إنك بتسمعني
وسحر عنيك مشبعني
بحبك كلمة ما اتحديتش
ف وقت التلج برد وجوع
مجرد كلمة ما كفيتش
نجيب بيها دوا لموجوع
حلمك بالوصول ممنوع
وفجرك مش باين له طلوع
ولسة الدنيا ما اخترعيتش
جرام الحب تمنه بكام ؟؟
ويتبدل بكام ساندويتش ؟؟
مشيت وقتها من غير كلام
مارديتش ....
الكاتب
عاطف كبارة
31/8/2021
ليست هناك تعليقات:
إرسال تعليق