حلاوة روح
أنا محتار مع بابى
يكون مفتوح
لأصحابى
أويكون مقفول
ويزعل منى
أحبابى
غريب الباب
مالوش مقبض
ولا متراس
ولو هبت شوية ريح
تفتحوا وخلاص
وأجيب متراس
وأقول مقفول
وأعيش أنا وحدى
وعن نفسى
أكون مسئول
وأقول أنا ونفسي
نعيش أصحاب
أحكيلها وتحكيلي
بدون دهشة
ولا إستغراب
وأمسح دمعتى
بإيدى
وأقول عادى
ولاحد يعرف
نقاط ضعفى
ولايتهمنى
بعنادي
وأقول
يكون مقفول
كده أفضل
والكل يغيب
ومع نفسى
أنا افضل
وأواجه نفسى
بعيوبها
وأكون لنفسى
أيوبها
وأصبر عليها
وأعينها
أصلها نفسي
وأنا منها
بابي
كان مفتوح
ودخل منه
كتير أوجاع
لوم وعتاب
بصوت مبحوح
وصوت عالي
وجالى صداع
والكلمة
تبقى حدوتة
وتركب
بساط الريح
وتدخل وتطلع
والباب مفتوح
بدون تصريح
وأعيش غرقان
وتكون الكلمة
دوامة
وتسحبني
لكل ودان
وملاقي
لشطي عوامة
وأموت
فى اليوم
متين مرة
بسبب كلمة
طعمها مرة
وأقفل الباب
وأقول
كده أحسن
من غير أحباب
من غير أصحاب
أكيد أحسن
وأسمع
دق على بابي
أقول حاضر
وعيني
تحن لأحبابى
وقلبي
يكون حاضر
وأشوف الباب
وأهز دماغى
وأقول
معلش
قلبي
ياباب كده زيك
كمان مفتوح
وكله يخش
وأعيش الرحلة
من تاني
ومن تاني
الاقى
الكلمة
وخداني
ومعاها
على بساطها
منين
ماتروح
وأعيش
اللي باقي
من عمرى
حلاوة روح
الكاتب
إبراهيم علي
29.11.2021
ليست هناك تعليقات:
إرسال تعليق