ما بين عشقين
عشت سنين
وراها سنين
وانا قلبي الوفي عايش
ما بين عشقين...
عشق أميرة حملتني
سقتني حنانها و راوتني
و ف برد الشتاء غطتني..
من وانا عمري يا دوب ساعتين...
وعشق إللى بحبها دايب
وسهمها لقلبي العليل صايب
و قلبي عنها مش تايب
دى ساكنه ف نن العين...
قالوا ...والوطن والدين؟؟
قولت الوطن هي..
وديني أمرني بأحسانها
ولو حتى قلبي حزين...
و قطر العمر السريع رايح
وسيف مر السنين جارح
وانا ف حيرة الهوى سابح
ما بين الردي وبين الزين...
وشاب الشعر وانا لسه
بفكر اعيش..قالولي انسى
ما ولى زمان كان فدان
الصدق فيه بقرشين...
وقولت لقلبي يا حسره
لا فيه اليوم ولا بكره
ولا حتى ولو فكره
اعيش لي يومين...
رد إللى طول عمره ف نار
قال والله انا محتار..
لا عمري سلمت م الأشرار
وعندي عطل ف الشرايين..
قالولي ليه للأمل فاقد
ما بين غدار وبين حاسد
دا مهما قلب الخسيس جاحد
مسيره يرق يوم ويلين...
وقالوا الدنيا لسه بخير
قولت ما كان هجرها الطير
وهج لقرب السما بيطير
اكيد على سطح أرضه سجين...
وبعد الفكر ما ودى و جاب
و فرز لقايمة الأحباب
قولت قدري اكيد غلاب
و ربك ع المأسي يعين....
مجنون القمر
الكاتب
سيد المبروك
6.3.2022
ليست هناك تعليقات:
إرسال تعليق