🚐🚐🚐 السباق 🚗🚗🚗
ــــــــــــــــــــــــــــــــــــــــــــــ،،
رويغــد بالحلى عالجرح لو ينحط
يطيب الأمس بالتحرير سابقني
تسابقنـا أنا و ٱيّـــاه طـــول الخط
معي دايو و هو بالفورش حانكني
و قلّي مبتسم ياليت من لك زط
يمازحني و يشتي بس يحرجني
لساني بالهواجس و القلم بالخط
تغـــزّل في جمــاله ذي مذوّبني
بحسنه والهيف ماشفت مثله قط
قمـر من جنة الفردوس عــذّبني
بغنجه و الدلع من بعـدما فحّـط
غمز و ٱشّر ببوسه يقصد ٱتبعني
لحقته بس عرقــلني مرور الخط
فضيّـــعته مع الزحمه و ضيّعني
ألا يا قهر قلبي ذا المرور أحبط
مساري بالإشـــاره عمد قاطعني
و كـــود الأخ فيصل بس يتنطط
من الطــاقه يقـــلّي ضاع يا جِنّي
أقُلّك حُط رجلك للمَهَرّي ٱشحط
و فلّت ذا المِرَزِّي نلحق ٱفهمني
فقلت ٱهجع بحـجر الله لا تغلط
عليَّـــا بس يكــفيني ٱلذي فيني
شعر:#ابو_ذو_الفقار_الآنسي
معاني الكلمات
ــــــــــــــــــــــــــ،،
المَهَرِّي : دواسة السرعه
المِرَزِّي : دواسة البريك (التوقف)
ليست هناك تعليقات:
إرسال تعليق