نُص نُص
عين تبص و عين ترف
و عين تكحلها بزفت
دنيا ليها ألف وش
لما أنصاف القوالب
فجأة مالت
هزت الجدران و قالت
إنها أفضل كتير
من قوالب كان وجودها
تملي سالب
و البقاء أصبح غريزه للي غالب
و اللي فارد في المخالب
و القوالب مالها عازه
هي عايشه بس تحلم بالمفازة
بين حيطان البيت بتشرب
في النشع
من إزازه اللذاذة
جوه دايره المتاهه
سارحة عايمة في المزازه
اعرف إن البيت بحالُه
يبقى قايل للسقوط.. للهبوط
و اللي كان خايف علينا
هو أول حد فينا
نفسه يرحل من سكات
الدفا مبقاش بيسكن في الحيطان
لسه برد الغربه ناخر في الجدور
لسه كاسر في السطور
الوجع له ألف سور
م المفاجأة دماغي فارت
كنت ماسك حبل غيظي
نادوا قالوا ابن موت
كان معاه البنكنوت
لما سافر قالوا ماتت
كنت راهن نفسي بيها
ويا مجموعة تذاكر
عدى قطر العمر خدها
من ساعتها لسه واقف
نص قلب و كام قصيدة
كنت حاضن كام كتاب
جرح مش عاوز يلم
كلمة دافيه.. حبل صوف
لَوِّني كل الحروف
حرف ماسك لسه سيف
حرف ساكن جوه خوف
دنيا ليها ألف وش
عين تبُصّ و عين ترف
وعين تكحلها بزفت
وألف عين كارهه الظروف
الف عين رافضة تشوف
وحيد علي الجمال سرس الليان محافظة المنوفية جمهورية مصر العربية
ليست هناك تعليقات:
إرسال تعليق