رباعيات مطرزه. فن الواو
ياميت خساره
العزوه كانت مسندي........................عالدنيا ومن فيها
ولا كنت اهاب العدا......................ولا اللي أفترو فيها
وسيرتنا كانت طبل ................. يفتح جميع لبواب
والهيبه كانت طبع .........................ميهزها أسباب
دخل الطمع بينا ............................. فرق مراسينا
ومشاكل مالها حل ...................... علي بر مارسينا
بقي كل واحد فوادي ........................والعدا زادو
وبقينا نفرح فبعض ................. والخير نقص زادو
كنا مثل للرجوله ......................الناس بتضرب بيه
ونحلها بسهوله .......................... ونكيد باشا وبيه
يافرحه الاندال لما ..................... أتفرقو الجدعان
نبحت كلاب السكك ...................واتساوت الاوزان
الندل صوتو علي ......................... ولملو حاشيه
والقرش في ايده جري.................والدنيا معاه ماشيه
والعزوه زمنها راح .................. وبقي الجنيه سيد
صاحبه يعيش في براح .......... وعلي سيده يتسيد
ولا عاد رجوله وأصول ............. ولا كبير ولا صغير
صاحب الجنيه يقول .................... كلامه مايتغير
ملعون ابو دا زمن.............. ....... طبع العيال ساده
الندل بقاله تمن. ................ وبيحكم علي اسياده
الحوجه مره صحيح ..................بس الشهامه طبع
ولو كبر الاسد أسد ................ والضبع يفضل ضبع
........................
رمضان عبدالباقي الاسكندريه
١٩ . ١١ .. ٢٠٢٢
ليست هناك تعليقات:
إرسال تعليق