علمتني الدنيا
موال
الظروف صعبه علينا
بنمشى فيها واحده واحده
مهما دنيتنا بتدى
برضه منا كتير دى واخده
علمتني ظروووووفى
ارضى بالقليل
وارفع الراس فى العلالى
ولا اخليهاش ابدا تميل
علمتنى انى امشى فى السليم
واخد الخبره في حياتى من حكيم
يعرف الدنيا كويس
ولصحابه هو ريس
والغنى مش كل حاجه
ده الفقير ليه الكريم
★*★*★*★
وعشت فى دنيتك معرفتش اى حاجه
وماشى فى سكتك ماشى بس بسذاجه
علمتنى الدنيا انى احلم كل يوم
وأصحى من حلمى وافوق بس اوصل للنجوم
علمتنى انى اكون هادى في طباعى
واللى اعوزه يجيبه مخى مش دراعى
وامشى فيها سنه سنه
اخرة الدنيا دى جنه
مش هاخلى الدنيا دية
يوم تزود من صراعى
★*★*★*★
الحياه حلفت لتاخد
كل حاجه من أيدينا
لما نكره حتى روحنا
والدموع تكره عنينا
علمتنى حياتي اعطف ع الضعيف
ابن بلدى هيقاسمنى فى الكتير وفى الرغيف
علمتني ان بلدى اغلى من امى وولادى
افتديها بكل روحى وبسعاده وبرضه راضى
ده الوطن مش طوب وارض
الوطن دينى وعرض
عمرى ماهنقص فى قيمته
لا فى رضايا ولا في عنادى
★*★*★*★
الشيطان مخلوق رجيم
نازل الدنيا
عشان يضحك علينا
بالخمور اوبالحريم
او بالقمار
تلعب ايدينا
علمتنى قناعتى ارضى بالحبيبه
اللى فى حياتى
مكسبى فى الدنيا بعد تقوى الله
هتكون مراتى
علمتني انى ابعد ع الحشيش او عن القمار
فى الحياه متعه بس فى الاخره دى نار
مش هاقول املالى كاسى
اللى هيغيب لى راسى
واللى هيتوهنى حبه
لما افوق القاه دمار
اغنية ( علمتني الحياه)
الكاتب
أدهم عبده مجلي
4.12.2022
ليست هناك تعليقات:
إرسال تعليق