( ست الكون )
أنا ابن الست
اللي عاشت عمرها كله
بتترجى حيطان الستر
مافيش صفحة لها ع الفيس
و لا تعرف بقى التوك توك
و عارفة إن البيوت أسرار
ماينفعشي الشرف يتلط
و عاشت عمرها راضية
و لا كانت في يوم فاضية
يوماتي تصحى و تعافر
تصلي الفجر
و لا عرفت في مرة الغدر
بتغزل صبر حرمانها
بخيط الود
تكفي الليل على برده
و لا تلعن كمان الشرد
و لا تشكي دموعها لحد
و لا تبكي في يوم حالها
لسانها يطيب و لا تتعب
من التسبيح
يوماتي تردد الفاتحة
و هيمانه بطعم الذكر
يقوم الكل ويبوسوا طهارة
خدها الساجد
و لا يعديشي علينا الفرض
و بخطف حضنها الدافي
و لا يقدر عليه حد
و عارفة كل طلباتنا
على فطارنا
و تدعي ربي يجمعنا
و لا يفرق ما بينا حد
و ترقي الكل بكفوفها
و لا يسكن مابينا شر
و يحفظنا وينصرنا
على الظالمين ولاد الكلب
نسبها في شغلها في بيتها
و لا يصعب عليها صعب
تكفي البيت بموجوده
كتير حافظة مابتبعترش
قليل عارفة بتتصرف
على قد اللحاف
رجلك كدا تتمد
تزور و تود في جيرانها
وتدعيلهم بطيب الرزق
تقول حاضر و لا تغضب
و مهما الأب كان قاسي
بتتحمل و تتجمل
و برضاها بيبقى سهل
أبويا كان راجل شقيان
و أطيب م الطيابة كمان
لكنه مرة يتنرفز
و صوته يعلى من غلبه
و كام مرة بيبقى صعب
فبطبطب على كتفه
مافيش بركه لنا غيرك
مايحرمناش ربنا منك
ولا وجودك ياسيد الناس
وجوه ملامحي سكناني
ماشوفتش حد يشبها
كدا في شكلي و لا في حبي
و لو جابوا جميع الخلق
أنا المنحوت على شكلك
كدا كربون
و باعشق كل تفاصيلك
ياست الكون
و يوم موتك كدا فجأة
أنا لبست الكفن صاحي
بلملم بُعدها عني
بدعوة فجر صباحي
و لا عمري في يوم سيبتك
و لا نسيتك
و زينب بنتي على اسمك
بتشبهلك على طبعك
دي جنة عمر أفراحي
وراحت ست أحلامي
سنين عمري و من بعدك
مواسم طرحها فاضي
و ستاتنا على اليوتيوب
كدا عايشين
دي واحدة بتشكي في همومها
و تلعن سلسفيل جوزها
و واحدة فيلا راح تسكن
و تعرض كل أسرارها
تكره في البيوت ناسها
و غيرها باكيه و بتشحت
لا هي راضية و لا راضيين
و لو تسمع بقى زيي
فنون الطبخ و المجانين
تقول دي الست راح تعمل
مشاوي العز راح تملى هوى
العاشقين
و في الآخر تلاقي الرز متحمر
و شوربة يا دوب تقضي اثنين
و جنبيهم كمان رغيفين
فبترحم عليك و أقول
و لا يوم من أيامك
يا ست الكون.....
وحيد علي الجمال
ليست هناك تعليقات:
إرسال تعليق