إمسك حرامي
زمان وأنا طفلة
مسكوا حرامي بيتسلل فوق سطح جيران
غرضه يسرق كام حلة علي كام فستان
وإذا بواحدة شافته طالع علي سطح البيت
فضلت تصوت وتستنجد بأهل البيت
وصفارة في الحتة زعقت إجروا يا ولاد
والدنيا إتقلبت في ثواني والشارع ماج
بجموع بشرية ماليها اخر وبسرعة يا واد
إجري يابنت إنتِ وهي دا حرامي خطير
جاي يسرق حلل أُم محمد علي أُم سمير
وعملوا له زفة في الشارع ضرب وتلطيش
وهو م الضرب يصرخ
سبوني ياناس أنا عاوز أعيش
الفقر هو اللي حوجني حرمت خلاص
سيبوني ياهو روحي بتطلع
أنا مت خلاص
نادت أصوات م الحتة ع القسم يا ناس
بدل ما يموت وروحه تطلع وكلنا نحتاس
وراح القسم بتشريفة ووراه ملايين
وغطيان الحلل ترن وتصدح خلف المسكين
وهدومه م الضرب إتعوجت
شمال في يمين
وصارت الزفة الغالية وإتنين ماسكينه
ومن خلفه حراس تابعينه
وأخدوه العسكر هيلة بيلة
علي جوة يا لص
وقفاه م الضرب معلم يجي خمسين كف
مش عارفة ليه تذكرته وجه علي بالي
قارنت بين لص أيامنا ولص زمان
صاحبنا كان لبسه مقطع من غير أكمام
كان غرضه يسرق كام حلة علي كام فستان
في أيامنا اللص طور نفسه وطور أساليبه ولو شاطر إنت إحلف لتجيبه
ياعيني علي مهنة إندثرت
وإتغير حالها
حتي السرقة بتطور
الدنيا إيه اللي جري لها
معلش يا دنيا ما كل حاجة إتقلبت
وإتشقلب حالها
أصبحت السرقة عيني عينك
ولا حد يغيث
ولا حد يقول مالك يا بني
غثنا يا مغيث
ليست هناك تعليقات:
إرسال تعليق