( الهجًاص )
بقلمي/ محمد سيوفى
---------------------------
الهجًاص مستوى باشاوات
حريًف لعب تلات ورقات
بيتوضا من دمع غلابه
ويصلي فروضه مناسبات
الهجًاص ليه أكبر كوم
نجم الشاشه ترند اليوم
صاحب حظوة وقيمه وسيما
ويمشي معاه زفه بالكوم
الهجًاص في كلامه مايع
تلقي الكدب ف عينه لامع
ساعة النصب يطرطق ودنه
وساعة الحق ماهوش سامع
دايس على قوت الغلبان
معدوم الرحمه وشيطان
ومبادئه بتتغير دايمٱ
وكأنها جلد لتعبان
الهجًاص حواراته كتير
استاذ في النصب على الغير
بيعملك م البحر طحينه
ويبعلك عتبه وتحرير
الهجًاص مُنتَج غابه
هجين من تعلب وديابه
يجمع قرشه وينفخ كرشه
لو هيبيع ماما وبابا
الهجًاص معدوم إحساس
بيبيع وبيشتري في الناس
وناس مختومة على قفاها
بتشوفه نموذج إخلاص
الهجًاص ورث أبو لمعه
ساعة العزا جاهزة الدمعه
وف الرقص بيغلب صافينار
فى الحالتين يفتح جامعه
الهجًاص بجناح وملاك
مصلحته عليك ولا معاك
حسب الحاله وحسب الدور
متصدر نجم الشباك
محمد سيوفى
ليست هناك تعليقات:
إرسال تعليق