زمان العجب
خلي عندك صبر و جلد
بكره يمكن الأمل يتولد
قلت الحق تطلع م البلد
أيوه عادي لو تشهد زور
بقرشين الحق يتقلب باطل
إللي عنده أمانة بقى يماطل
قالوله يا باشا مع أنه عاطل
أيوه كل الناس تلف و تدور
خلوا الواحد بقى اتنين
يعني حسن بقى حسين
حقيقة حالنا ف كلمتين
الجار على الجار بيجور
علاقات متقطعة أحبالها
القرايب ما جه على بالها
الجفا بقى طبعها و حالها
ما عاد حد لقرايبه بيزور
اتنسى الود و الإخلاص
ما فارقه قله من بلاص
بلبيس زيها زي أنشاص
يا ريت العمى بقى يغور
يعيش الزمن المعاصر
الكراهية وحش كاسر
لا منها مفر و لا ناصر
بين القرايب ألف سور
حلوا حياتكم بالحنان
بالحب تعيش كإنسان
بالمحبة تنالوا الجنان
النعيم و صبايا الحور
الكاتب
السيد عطاالله.
16/11/2024
ليست هناك تعليقات:
إرسال تعليق