خليك شفاف
خليك شفاف
ولا تظهر للمخاليق أبدًا
عيش ف الظلمة
زي الخفافيش
اتأقلم عيش
وخرج للدنيا ف عز الليل
واتمطَّع وافردلك كام ريش
بس اوعى ف يوم تخرج للنور
ترجع مكسور
هيجرّحوا فيك
وتبات مقهور
أو ينحروا فيك
تصبح باهت بضمير مبتور
إوعاك والشمس
تكشف روحك للناس على حق
وبسرعة تبان والعيب يتشاف
خليك متداري
ادفن جواك كل الأحلام
قبل ما تكبر اوئدها أوام
صدقني ده طيش
وغبار أوهام
ولو عدا وطبطب على كتفك
منهم مخلوق
إوعاك تفرح وف لحظة تروق
خليك فاكر ده بجد خازوق
هيعوزك عبد وهو السِيد
مع إن البيه عمره ما كان أصلي
على أد الإيد وكمان تقليد
لكن لو ترفض
هيعيب ويلطش فيك ده أكيد
والدنيا ف وشك تضرب بوذ
وف عِز ربيعك تبقى عجوز
والعالم كله يلف عليك
يتسلوا ويشتروا ويبيعوا فيك
ييجي خريفك
يصبح لنهارهم أكبر عيد
طب ليه تحلم
وتصبح تندم
ليه أصلا وشك يتشاف
ومن ظلم الناس تِتدارى وتخاف؟!
البس على وشك ألف قناع
خليك مخفي
خليك شفاف
#أمل_أمين_الخولي
#رحالة
#Felicite_World
ليست هناك تعليقات:
إرسال تعليق