(( أشوف بختك ))
قرب .. قرب خٌش وجرّب
واوعى تخاف وتقول هتكهرب
لو بتشوفها كٌحل و ظلمه
هنورهالك واضبطهالك
بس تعالى وبلاش تهرب
اوعى تقول مابشوفش وخايبه
لا متخافشي هريح بالك
ولو حسيت الدنيا بتقلب
هضربهالك واعدلهالك
و ابين زين ابين
هشوف البخت للحلوين
وبرضه عادي ابين
وممكن اشوفه للوحشين
ده كله نصيب ومكتوبلك
ولو هتعيش له بس يومين
لازم يخلص .. وهتخلّص
ما هي اسمها دِيه وسلف و دِين
وابين زين ابين
أبين كل أخبارك
ولو عاميه هبرقلك وراح أخمن
وهفضح سر أسرارك
وهتمتم .. وهدندن
واشقلبلك ف أحوالك
وهوصف لك دوا لقلبك
وايه يزود ف راس مالك
ولازم أيوه هتصدق
وهتعيش جوا في خيالك
واسيبك ويا احلامك
تنام فرحان ومتعشم
وتحلى الدنيا قدامك
ولو تعبان ومتخرشم
وارسم ضحكة ف عيونك
عشان تفرح وهتكمل وتتعلم
إن الكلمة بتداوي وبتجرّح
ودواها شِفا وترياق
بس جراحها
نار تكوي وبتعلِم
#أمل_أمين_الخولي
#رحالة
#Felicite_World
ليست هناك تعليقات:
إرسال تعليق