أوراق الخريف...
ضحك علينا الزمن
و رمانا في بحوره
و سابنا بين الموج
نتحامى في همومه
لا دقنا مرة هناه
و لا يوم فرد طوقه
بيحلم في وسط الموج
تلحقه سفينة
و يا ريت سفينة نوح
تيجي نواحينا
الكل جوه البير عشمان
في موروده
بيحلم في وسط الخوف
بحبال كدا تشيله
و تحطه جوه أكفان
بياضها يدعيله
مضحوك علينا بكام
وحسابنا ناسينه
ورق الخريف أهه طاح
و العود لابس الأخضر
يا دنيا مين مرتاح
و مين ع الشوك بقى يقدر
القلب فينا جبان
مسجون بقاله زمان
ع التوهة جابرينه
و أولادنا بقوا مساكين
ماشين لورا و حالفين
ما يفوقوا و يضيعوا
زمن الفتن أهه شاخ
و احنا مجاذيبه
في مولد الأشباح
راكعين نبوس ايده
امته السما تضمنا
و أرواحنا تتعافى
و تجود علينا بدوا
و أوجعانا تتصافى
الكاتبة
تهاني بركات.
8/9/2023
ليست هناك تعليقات:
إرسال تعليق