ما تحاولش....
الوجع بايت يئن
عادي أصله مش مهم
جرح عادي راح يمر
حتى لو غرقان ف دم
لو صرخت بعلو صوتك
مش هيفهم حد موتك
أو يحس بكسر روحك
و الكلام من غير حروفك
شيء هلامي كله هم
كل يوم راكب له وش
مش حقيقي كله غش
بلاص عسلنا دود و مش
و الطير جريح لازمله عش
خلي بالك ما تحاولش
أصل قلبه كان رخيص
ما يستاهلش كسر قش
بس كان في الحب غاوي
يجمع الشعر في غناوي
يوصل الليل الطويل
يحكي وجعه عل القهاوي
صوته صاحب ناي حزين
كان رسول الود بينا
فجأة تاهت الخطاوي
و الرحلة طالت في المواني
سهمه صابني كان ضبابي
سابني أعاني و خد شبابي
سجن مرعب جوه ماضي
بينحت فينا قلب فاضي
طرحه باهت بلون رمادي
فلو ضروري تحب تاني
بيع في وجعك لحد شاري
تهاني بركات ١٣ / ٨ / ٢٠٢٥
ليست هناك تعليقات:
إرسال تعليق