....... تربس يا واد الباب ...
تربسْ يا واد الباب
خلاص ..محدش هيسأل
دا ما عدش فيه أحباب
ولا سهرايه حلوة
حتى من أصحاب
تربس يا واد الباب
هاتي يا بنتي لقمة
وبعدها كباية شاي
راح زمن اللمة
بقى زمن الواي فاي
تربس يا واد الباب
لا حد رايح ولا جاي
افتحي يا ام العيال الشاشة
نشوف مسلسلات وأفلام
اللي ملهاش طعم
مجبتناش خطوة لقدام
يا ضنايا قوم يا ابني
امسك كتابك شويه
دا احنا كنا قبلك
معشناش الأيام ديه
دا التليفون هياخد نظرك
اسمع كلامي شوية
بتقول معنديش لبس
وحياتك والله يا ابني
الدولاب يحمل عربية
دا احنا كنا زمان
بنشحت من بعض الجلبية
ذاكرنا على لمبة جاز
والباشا اللي كان عندو طبلية
ارضَ يا ابني بنصيبك
واتعلم حاجة تفيدك
ااهو يمكن تاخد كليه
شهادة تكون سلاحك
تنفع بيها بلدك
ويمكن يا ابني تكون
سند ليك وليه
الكاتب
رمضان محمد محمود
25/1/2021
ليست هناك تعليقات:
إرسال تعليق