ولسة بحلم
رسمت حلم حياتي
بخطوط صباع طباشير
الحلم كان ف كياك
مسح الخطوط امشير
وبعدين ياحلم معاك
العمر مفهش كتير
امشير فات وكياك
والحلم مالوش تفسير
٠٠٠٠٠٠٠٠٠٠٠
من صغري بحلم بدنيا
فاتحة الأيدين للكل
صباحها زي الورد
ومساءها عبير الفل
والخير يكون موجود
ومافيش مكان للغل
ولاناس تعيشها إسود
ولا ناس تموت م الذل
٠٠٠٠٠٠٠٠٠
بحلم بعالم مثالي
وأصله مش موجود
وتارك العنان لخيالي
يمرح لأقصى حدود
ولما الواقع نداني
لقيت الطريق مسدود
منه لله خيالي
سحرني ومالوا وجود
٠٠٠٠٠٠٠٠٠٠
بحلم وحلم عمري
كان سهل وبسيط
وقفت استنى دوري
وصحيت بدري ونشيط
دفعت عمري فوري
ام جالي بالتقسيط
بعاتبه لضياعه عمري
ام قالي أصلك عبيط
٠٠٠٠٠٠٠٠
بحلم وحلمي
ماشفت صورته
ولااعرف ملامحه
ولا عمري زرته
بيجي في خيالي
يادوب طشاش
إنده عليه
يعمل طناش
٠٠٠٠٠٠٠
حلمي أصله
واطي وخسيس
ولا عنده دم
ولا كان حاسيس
وفي البكش
أفضل ونيس
وأقول بكرة يظهر
أصحى بدري
القاه فطيس
٠٠٠٠٠٠٠٠٠
ياحلم بايخ
ضاع فيك سنيني
مانبني منك
غير وجعي وأنيني
طلعت فالصوا
وصناعة صيني
ولاعدت أزورك
ولاعاد تجيني
الكاتب
إبراهيم علي
28.11.2021
ليست هناك تعليقات:
إرسال تعليق