بتحلم تعيش
عايز تعيش لازم تموت
لازم من الضلمة تفوت
و تعمل من الأحزان تابوت
محطة وصولك
متذوقة بدمع العيون
لازم تخوض المعركة
جوه حواري من جنون
ما فيهاش قانون
أصل الحياة مش حقنا
الحياة حلم اترسم
ألوانه باهته من الظروف
اعمله زوم
حاول توضح الحروف
أو اركنه فوق الرفوف
الحلم جوانا اتوأد
لما الليل اتولد
اصلب في طولك و اتسند
شد الوتد
ما تشتكيش من وضعنا
خليك أسد
جوه الحيطان المترممة
و الطين اللي مخلوط بدمنا
يا زهر الربيع اللي دبل
فوق سطحنا
لسه الشموس وعدانا
تيجي لحيّنا
يا أرض بور مروية ليه بدمنا ؟
فين عمرنا فين حلمنا ؟
هو شقانا مستباح ؟
ولا انكتب علينا النواح !
ما تسألوش عن السبب
الموت علينا انكتب
عشان نعيش جوه الكفن
ذكرى مكتوبة للزمن
ماتت زهور في عز الربيع
كان ذنبها بتحلم تعيش
الكاتبة
تهاني بركات ٢٨ / ٦ / ٢٠٢٤
ليست هناك تعليقات:
إرسال تعليق